Die ontwikkeling van die kind in sy totaliteit.

Die leerders word met die nodige kennis, vaardighede, gesindhede en Christelike norme toegerus sodat hulle as waardige, gelukkige en produktiewe landsburgers sal lewe en werk.

Dit gee aan hulle die nodige vaardighede en selfvertroue om die groot wêreld daar buite aan te durf.

Welkom by een van die mees unieke skole in Suid- Afrika. Die Hoër Landbouskool Marlow is ‘n skool soos enige ander skool, maar ook ‘n skool soos geen ander skool in Suid-Afrika. Hierdie seunskool met sy unieke karakter haal net die heel beste uit elke leerling en die trotse prestasies van leerlinge, onderwysers en oudleerlinge is ‘n weerspieëling van die karakterbou wat hier plaasvind.

Hierdie landbouskool waar alle leerlinge in koshuise op die plaas 10 km buite Cradock bly, is wyd bekend. Die akademiese prestasies van die leerlinge, asook die prestasies van die honderde oudleerlinge wat hul plek volstaan in ‘n verskeidenheid beroepe, is ‘n bewys dat die leerlinge voorberei word vir die eise van die volwasse lewe. Die baie uitsonderlike sportprestasies in ‘n verskeidenheid sportsoorte van die leerlinge en oudleerlinge, is 'n bewys van die goeie afrigting wat die leerlinge hier ontvang asook die gemotiveerdheid van die leerlinge om te presteer. Die unieke groepsgees wat jy by geen ander skool in Suid-Afrika sal kry nie, dra natuurlik by tot die pragtige prestasies. Voeg daarby die opleiding wat die seuns op landbougebied ontvang asook die feit dat hul altyd naby die natuur lewe en jy kry ‘n resep vir geluk en sukses.

Marlow het sy deure in 1931 geopen en het deur die jare ‘n unieke karakter ontwikkel. Hierdie karakter word soos ‘n kleinood bewaar deur personeel en leerlinge. Die tradisies wat eie is aan hierdie skool kry u nêrens anders nie. Dit maak Marlow anders. In hierdie webruimte sal u meer kan uitvind oor hierdie unieke skool. Geniet dit om meer uit te vind oor die skool waar die waardes en norme wat hier geld, elke ouer laat rustig slaap.

F H OLIVIER
SKOOLHOOF
 

Die Hoër Landbouskool Marlow het in 1993 die eerste O/13 rugbyweek aangebied en nooit kon droom dat hulle in 2010 hulle negentiende week gaan aanbied nie. Vanaf die eerste keer wat hierdie week gehou is, was dit duidelik dat hierdie week ‘n baie groot sukses is en dat die skole wat dit bywoon, dit elke jaar baie geniet. Marlow het gou besef dat die aanbied van hierdie week ‘n groot leemte onder laerskole gevul het omdat dit al hoe moeiliker vir hierdie skole raak om te gaan toer. Nie net is die week baie bekostigbaar nie, maar is dit ook baie veilig vir die seuns en afrigters wat dit bywoon. Tydens die week kry die skole nie net die geleentheid om hulle spanne vir die komende seisoen reg te kry nie, maar is daar ook kans om hulle kragte op die rugbyveld te toets teen skole van ander provinsies.

Die feit dat baie skole wat die eerste week bygewoon het, nog steeds elke jaar Marlow se O/13 week bywoon, wys dat die week werklik baie vir hierdie skole beteken en dat hulle dit sien as belangrike voorbereiding vir die komende seisoen. Baie skole skryf dan ook elke jaar hulle suksesse op die rugbyveld toe aan die feit dat hulle die week bygewoon het.

Tydens die week word baie tyd spandeer aan afrigting en ander fasette van rugby, maar daar word ook tyd gemaak vir ‘n sinvolle ontspanningsprogram en die spelers en hulle onderwysers kry die geleentheid om op ‘n eg plattelandse wyse te ontspan. Deur die jare het die spelers en afrigters dan ook baie hegte vriendskapsbande op Marlow gesmee en baie skole wat die week bywoon, begin onderlinge toernooie en wedstryde in die betrokke seisoen reël.