Marlow atletiek kyk terug op ‘n suksesvolle seisoen

Met die rugby wat reeds in volle swang is kan die Hoër Landbouskool Marlow terugkyk op ‘n uiters suksesvolle atletiekseisoen. Die feit dat Marlow beskik oor ‘n groep seuns wat nog passievol is om deel te neem aan ‘n sport wat die laaste aantal jare grootliks moes terugstaan vir meer gewilde spansporte, is ‘n voorreg waarmee min skole kan saampraat.

Hierdie woorde word nie ligtelik geuiter nie en deeglike bewys hiervan was die meer as 100 seuns wat by die plaaslike Inxuba Yethemba (Middellande) Distriksbyeenkoms in die veld gestoot is. Nie net het hierdie groot aantal seuns deelgeneem nie, maar het hulle ook die byeenkoms oorheers deur meer as die helfte van die seunspan uit te maak wat na die Mega Distriksbyeenkoms deurgedring het. Die positiewe en lewenslustige geaardheid waarmee die Wolramme hierdie byeenkomste en die seisoen oor die algemeen benader het, is prysenswaardig en het telkens komplimente van vriend en vreemdeling ontlok.

Marlow seuns was by verskeie geleenthede betrokke by meer as een sportsoort op dieselfde dag en het sonder huiwering en in ‘n positiewe gees oral deelgeneem. Marlow is dankbaar vir hierdie gesindheid wat die Wolramme telkens openbaar het!

By die Chris Hani Mega Distriksbyeenkoms presteer die Wolramme uitstekend, maar die naellopers maak in besonder goed gebruik van perfekte toestande met vier atlete wat droomwedlope hardloop om die 11 sekonde grens te breek. Hierdie naellopers, Zubin Baartman (10.61), Hannes Coetzee (10.74),Michael Botha wat nog sestien jaar oud is(10.81) en Chris Beets (10.91) kan regtig tevrede voel en hul prestasies dien as beloning vir soveel toewyding en harde werk reeds lank voor die seisoen nog begin het.

Na afloop van die Mega Distriksbyeenkoms word negentien atlete gekies om na die Oos-Kaap byeenkoms in Oos-Londen deel te neem. By die Oos-Kaap byeenkoms presteer drie atlete goed genoeg om vir die Oos-Kaap span te kwalifiseer om by die SA Skole byeenkoms in die Paarl te gaan deelneem. Baie geluk aan Hannes Coetzee, Danie Louw en Sean van Zyl vir hierdie uitstekende prestasies. Marlow is voorwaar trots op julle!

By die SA Skole byeenkoms behaal Danie ‘n negende plek in die gewigstoot terwyl Hannes ‘n uitstekende agste plek in die 400m hekkies behaal. Baie geluk Hannes en baie dankie vir jou besondere toewyding!

Buiten vir die SA Skole been van die atletiek, stuur Marlow sewentien atlete om aan die OP Juniors atletiekbyeenkoms by die NMMU atletiekbaan in Port Elizabeth te gaan deelneem. Tydens hierdie byeenkoms word Hannes Coetzee en Danie Louw as OP kampioene gekroon in die 400m hekkies en diskusgooi vir negentienjarige seuns onderskeidelik. Om die kroon te plaas op manhaftige deelname in stormweer word vier Wolramme, Hannes Coetzee, Danie Louw, Michael Botha en Faan Greyling na afloop van die byeenkoms verkies vir die OP span om aan die SA Juniors byeenkoms in Germiston te gaan deelneem.

Tydens die SA Juniors byeenkoms moes Hannes tevrede wees met ‘n negende plek in die 400m hekkies terwyl Danie sy twaalfde plek in die diskusgooi by die SA Skole byeenkoms oortref het deur hierdie keer in die negende plek te eindig.

Baie dankie aan elke afrigter, atleet en organiseerder vir u bydrae, in watter mate ook al, tot die sukses wat Marlow atletiek vanjaar behaal het. Ons sien uit na ‘n volgende seisoen met die room van die Middellande!

UIT ONS ARGIEWE:

Marius Corbett, wêreld spiesgooikampioen (1997) was in 1993 die hoofseun van Marlow. Na sy pragtige prestasie het die volgende berig in die koerant verskyn

Die vreugdevure het Dinsdagaand 5 Augustus hoog gebrand by die Hoër Landbouskool Marlow toe Marius Corbett, oud-leerling van die skool, die eerste Suid-Afrikaner geword het om gekroon te word as 'n wêreldkampioen tydens 'n wêreld atletiekkampioenskap. Marius was vanaf 1989 tot 1993 'n leerling by Marlow en was ook gedurende 1993 die hoofseun van die skool.

Marius het as standerd ses leerling begin deelneem aan spiesgooi en moes in sy standerd ses en sewe jare tevrede wees met derdeplekke tydens die jaarlikse kleurebyeenkoms. Hy het egter volhard en volgehou om te oefen en kry dan ook in sy standerd sewe jaar die eerste maal O P kleure vir spiesgooi. Vanaf sy 0/16 jaar vaar hy al hoe beter en in 1992 wen hy as 0/17 atleet die goue medalje by die Suid Afrikaanse Junior Atletiekkampioenskap. Gedurende Oktober van 1992 verbeter hy die 0/17 Suid Afrikaanse rekord na 74,74m by 'n byeenkoms op Cradock.

In sy matriekjaar vaar hy weereens baie goed en behaal weer goud by die S A Junior kampioenskap. Hy word ook as kaptein van die S A skolespan aangewys gedurende hierdie jaar. Marius word gedurende sy matriekjaar ook uitgenooi om in Europa te gaan deelneem en moes baie vinnig 'n keuse maak of hy aan die Cravenweek moet deelneem of hy gedurende die wintermaande in Engeland moet gaan spiesgooi. Hy besluit op atletiek en doen waardevolle internasionale ondervinding op.

Na matriek gaan studeer hy aan die Universiteit van Potchefstroom waar hy weereens die goue medalje wen by die S A Junior kampioenskap en hy verbeter ook die S A en Afrika Junior rekords. In hierdie jaar word hy dan ook gekroon as Junior wêreldkampioen toe hy die goue medalje wen by die Junior Wêreldkampioenskappe.

Hierna volg 'n frustrerende tydperk vir Marius toe hy intens gepla word deur beserings en sy eerste twee jare as senior atleet kon hy dan ook nie deelneem nie met die gevolg dat almal gou van hom vergeet het.

Gedurende 1997 neem hy egter weer voluit deel en word vir die eerste keer die S A Senior spiesgooi kampioen. Alhoewel baie geglo het dat Marius die eindronde sal haal by die Wêreldkampioenskappe, het niemand geglo dat hy gekroon sal word as wêreldkampioen nie.

Marius het deur al die jare gewys dat hy die temperament het vir die groot oomblik en waar baie atlete vou onder druk, is dit Marius wat altyd sy beste uithaal en van sy beste afstande gooi. Miskien het dit te doen met sy nederige lewenshouding en ook die feit dat sy prestasies nooit na sy kop gegaan het nie.

Marius se vader, Fanie Corbett, is ook 'n oudskolier van Marlow terwyl sy drie broers almal hul skoolloopbaan op Marlow voltooi het. Fanie het ook vir jare gedien op die bestuursliggaam van Marlow.

Marius is vir die duur van sy skoolloopbaan afgerig deur die huidige skoolhoof, Hennie Olivier terwyl hy tans afgerig word deur Terseus Liebenberg.

Die Hoër Landbouskool Marlow is dankbaar om te kon bydra tot die vorming van Suid Afrika se eerste wêreldkampioen.