Op Marlow is rugby 'n leefwyse, nie maar net nog 'n sport nie. Ons glo nie dat daar enige ander skool in Suid-Afrika is waar daar so 'n groot persentasie leerders rugby speel nie. Om Saterdag vir Saterdag veertien rugbyspanne te laat speel, is besonders vir 'n skool met 260 seuns.

Nog meer besonders - die entoesiasme waarmee rugby aangepak word deur die personeel en leerders. Op Marlow speel seuns rugby wat by baie ander skole nooit eers aan sport sou deelgeneem het nie. Hulle doen dit vir hulle skool en hulle span en ons sien week na week hoe hierdie seuns se rugby verbeter. Die entoesiasme wat ook uitgaan van die afrigters, skool- en koshuispersoneel, maak ons rugby baie spesiaal. Hoeveel kilometers, afgelê word, hoeveel man-ure spandeer word aan rugby, hoeveel padkos is al voorberei en verorber in hierdie seisoen. Ook die personeel wat nie direk met afrigting te doen het nie, maar help met voorbereiding en verkoop van lekkernye langs die veld maak rugby op Marlow 'n spanpoging wat moeilik geklop sal word.

Voeg daarby die entoesiasme van ons ouerkorps en jy het 'n wenresep. Om Saterdag na Saterdag dieselfde ouers langs die rugbyveld te sien op dorpe oor die hele Oos-Kaap is besonders. Ouers ry uit die Vrystaat, Noord-Kaap en Wes-Kaap om hulle seuns te kom ondersteun. Min skole kan so staatmaak op ouerondersteuning soos Marlow.

Hier in Maartmaand, as jy so in die omgewing van half tien in die aand hoor hoe al die leerlinge tussen die twee koshuise bymekaar kom en hul rugbyliedjies sing, dan weet jy dit is weer sulke tyd - rugbytyd!
 

MARLOW RUGBY GAAN VAN KRAG TOT KRAG

Rugby is al lankal nie net meer ’n sport nie. Dit is vir baie spelers ’n beroep waar groot salarisse verdien word. Marlow besef dit en daarom sal daar voortdurend na rugby ontwikkeling gekyk word om seuns voor te berei op die eise van professionele rugby.

Die besluit, jare gelede, om meer teen die sterk skole in Suid-Afrika te speel werp vrugte af. Toe Marlow teen skole soos Framesby en Daniël Pienaar begin speel het, het Marlow slegs enkele wedstryde gewen. Tans kompeteer ons teen sterker skole en baie gereeld is dit hierdie skole wat op hulle neus kyk en met enkele oorwinnings huis toe gaan.

Aangesien Marlow elke Saterdag 14 spanne in die veld kan stoot met sy 260 ingeskrewe leerders was dit nodig om weg te doen teen wedstryde teen die plattelandse skole. Die meeste van hierdie skole kan ses van ons spanne akkommodeer wat net nie meer voldoende is nie. Tans speel Marlow dus teen Brandwag, Framesby en Daniel Pienaar in die O P, teen Diamantveld, Noord-Kaap en Landboudal in die Griekwas, teen Queens en Hudson Park in die Grens, teen Oakdale in SWD, Boland Landbou in die WP. Dan word daar op rugbydae en toernooie teen spanne soos Grey Kollege van Bloemfontein, Grey in Port Elizabeth, Selborne van Oos-Londen en baie ander rugbyskole in Suid-Afrika gespeel.

Hierdie besluit om teen die groter skole te speel werp vrugte af aangesien die spelers gewoond word aan die druk, spoed en karakter van groter skole wat hemelsbreed verskil van die plattelandse liga. Dit bevoordeel dan ook spelers wat aan proewe deelneem vir provinsiale spanne. Die aantal seuns van Marlow wat dus deelneem aan provinsiale toernooie het die afgelope vyf jaar dus radikaal toegeneem. Die afgelope ses jaar lyk die statistieke soos volg:

Vanjaar het Marlow ses 0/18 Cravenweekspelers nl. Corrie van Zyl, Henfred Linde, Ricky van Straaten, Lood de Jager, Zubin Baartman en Dean Ferreira. Ricky is ook aangewys as die kaptein van hierdie span. Vier seuns tw, Inus Pretorius, Corrie van der Walt, Louis Snyman en Bennie Kitching is gekies vir die O P Platteland Akademiespan. Ronnie Beyl en Peet Schoeman is vir die O P Grant Komo 0/16-span gekies.

Om net teen groter skole te speel, kan ook nie alleen help nie. Toewyde en lojale afrigters dra by tot die sukses van Marlow rugby. Tien onderwysers en vyf buite afrigters van Cradock rig die veertien spanne af. Die passie en lojaliteit vir Marlow, vir die spelers en vir mekaar as afrigters maak ’n groot verskil. Daar word voordurend gekyk na die nuutste en beste afrigmetodes en na elke rugbydag word die wedstryde ontleed en gekyk waar verbeter kan word. In 2010 het ses afrigters die uitstekende afrigtingskursus van Jake White bygewoon en die kennis hier opgedoen is oorgedra aan alle afrigters.

Rugby gaan egter lankal nie net oor afrigting nie. Daar is dus vanaf 2011 ’n formele ooreenkoms aan gegaan met Nerine Loock wat ook as biokinetikus van die Southern Kings optree. Sy het die seuns individueel getoets en oefenprogramme uitgewerk om die seuns sterker, vinniger en taaier te maak. Sy word in hierdie proses bygestaan deur dr. Stefan Schoeman wat saam met Nerine verantwoordelik is vir die fisiese voorbereiding van die spelers, maar ook vir die rehabilitasie van beseerde spelers. Hulle bedryf saam ’n hoë prestasie eenheid vir alle sporte. Marlow is dus bevoorreg om ’n mediese dokter te hê wat by oefeninge en wedstryde die seuns bystaat met mediese kennis. Dr. Schoeman het dan ook ’n spreekkamer op Marlow.

Tans is Marlow ook besig om ’n nuwe gimnasium te bou wat sal voldoen aan al die vereistes van moderne afrigting en kondisionering van spelers vir die groter eise van die spel. Die korrekte gewigte en oefenapparate sal deur Nerine Loock en dr. Stefan Schoeman uitgesoek word sodat die seuns maksimaal kan baat by hierdie nuwe gimnasium.

As ons kyk na prestasies van die Marlow seuns in ander sportsoorte kyk, is dit duidelik dat alle sportsoorte baat vind by die passievolle afrigting deur alle afrigters in alle sportsoorte op Marlow.